Fréttir frá árinu 2003
Einkavæðing helstu ríkisfyrirtækja árin 1998-2003
Ríkisendurskoðun telur að íslensk stjórnvöld hafi í meginatriðum náð helstu markmiðum sínum með einkavæðingu ríkisfyrirtækja á árunum 1998-2003. Þá verður að telja að framkvæmdanefnd um einkavæðingu hafi almennt fylgt settum verklagsreglum við sölu fyrirtækja og haft markmið stjórnvalda með einkavæðingu að leiðarljósi í störfum sínum. Nokkrir hnökrar voru þó á framkvæmdinni í einstökum tilvikum. [meira]
Sameining sjúkrahúsanna í Reykjavík: Mat á árangri
Ríkisendurskoðun hefur sent frá sér skýrsluna "Sameining sjúkrahúsanna í Reykjavík. Mat á árangri". Þar er leitast við að meta árangurinn af sameiningu Ríkisspítala og Sjúkrahúss Reykjavíkur í Landspítala - háskólasjúkrahús (LSH). Í skýrslunni kemur fram að erfitt sé gefa afdráttarlaus svör við því hvort sameiningin hafi skilað tilætluðum árangri þar sem ekki voru sett fram mælanleg markmið fyrir sameininguna. Ljóst sé þó að kostnaðarlega hefur sameiningin ekki skilað ávinningi en faglega séð hefur hún styrkt spítalann. Hann getur þó nýtt enn betur þá möguleika sem nýja fyrirkomulagið veitir og bætt starfsemi sína á ýmsum sviðum. Þá þurfa stjórnvöld að leggja skýrari línur um það hvernig sjúkrahús LSH er ætlað að vera í framtíðinni. [meira]
Endurskoðun ríkisreiknings 2002
Í skýrslu Ríkisendurskoðunar Endurskoðun ríkisreiknings 2002 eru ekki gerðar neinar stórvægilegar athugasemdir við þá aðila sem endurskoðunin náði til. Stofnunin vekur þó athygli á þeim vanda sem orðinn er í álagningarkerfi stærstu tekjuþátta ríkissjóðs og tengist erfiðleikum við að áætla þá og meta með tilliti til raunverulegra tekna sem færa á í ríkisreikning. Þá er einnig bent á að útgjöld á um fimmtungi fjárlagaliða fóru fram úr þeim mörkum sem fjárlög og reglugerð um framkvæmd fjárlaga kveða á um. [meira]
Ný heimasíða
Ríkisendurskoðun hefur uppfært heimasíðu sína. Annars vegar hefur gamla íslenska síðan verið aukin nokkuð og vonandi bætt. Hins vegar hefur verið samin ensk útgáfa. Síðurnar eru örugglega ekki gallalausar fremur en önnur mannanna verk. Því verður öllum ábendingum tekið með þökkum. [meira]
Siðareglur í opinberri stjórnsýslu
Á undanförnum árum hafa stjórnvöld og opinberar stofnanir víða um lönd samið sér sínar eigin siðareglur enda telja margir að slíkar reglur komi að góðum notum við að draga fram megingildi viðkomandi starfsemi, efla samkennd starfsfólks og fagleg vinnubrögð og auðvelda því að bregðast við siðferðilegum álitamálum á vinnustað. Sömuleiðis minnki þær hættuna á áföllum og hneykslismálum. Hér á landi hafa nú þegar um 15% opinberra stofnana sett sér siðareglur og margar aðrar stefna að því að setja slíkar reglur á næstu árum. [meira]
Grunnskólakennarar. Fjöldi og menntun
Að mati Ríkisendurskoðunar verður nánast eða alveg unnt að manna íslenska grunnskóla með réttindakennurum skólaárið 2008-2009 þrátt fyrir að þá verði þörf fyrir fleiri kennara en hingað til hefur verið áætlað. Þegar þessu takmarki hefur verið náð er eðlilegt að skólayfirvöld fari að huga að því hvort rétt sé að lengja nám grunnskólakennara úr þremur árum í fjögur til samræmis við það sem tíðkast í flestum Evrópulöndum. Sömuleiðis þurfa þau að taka til athugunar hvernig heppilegast sé að standa að sí- og endurmenntun kennara sem æ ríkari þörf verður fyrir í framtíðinni. [meira]
Veðurstofa Íslands
Að mati Ríkisendurskoðunar er meginstyrkur Veðurstofu Íslands jákvæð ímynd hennar og að hún hefur að jafnaði verið rekin í samræmi við fjárheimildir. Stofnunin þarf hins vegar að styrkja yfirstjórn sína og efla samstöðu hennar. Kveða þarf skýrar á um hlutverk hennar í lögum, endurskoða skipurit hennar og móta skýrar starfslýsingar og raunhæf árangurstengd markmið. Þá þarf stofnunin að leggja aukna áherslu á árangursmælingar og virkt gæðaeftirlit í starfsemi sinni. Að lokum þarf hún að taka á ýmsum atriðum til að bæta almenna veðurþjónustu, bæði tæknilega og faglega, svara kröfum samfélagsins um aukna þjónustu og efla grunnrannsóknir og þróunarstarf í veðurfræði. [meira]
Náðist árangur? Úttekt á árangursstjórnun í ríkisrekstri
Að mati Ríkisendurskoðunar er innleiðing árangursstjórnunar enn tiltölulega skammt á veg komin hjá íslenska ríkinu þó að rúm sex ár séu liðin frá því að hafist var handa við verkefnið. Meðal helstu ástæðna þess hve hægt hefur miðað eru skortur á langtímastefnu einstakra ráðuneyta og vandkvæði margra stofnana á að taka upp nýja stjórnunarhætti. Ríkisendurskoðun telur engu að síður að árangursstjórnun geti orðið mikilvægt stjórntæki í ríkisrekstrinum ef vel er á málum haldið. Sú vinna sem lögð hefur verið í verkefnið ætti sömuleiðis að geta skilað árangri þegar fram líða stundir. [meira]
Ársskýrsla Ríkisendurskoðunar 2002
Ríkisendurskoðun hefur sent frá sér ársskýrslu sína fyrir árið 2002. Þar er m.a. gerð grein fyrir starfsemi og árangri liðins árs og horft fram á við til komandi tíma. Þá fylgir með sundurliðaður ársreikningur og listi yfir þau rit sem stofnunin gaf út árið 2002. [meira]
Stefnumiðað árangursmat hjá Ríkisendurskoðun
Í riti Ríkisendurskoðunar Kennitölur um umsvif og árangur (2003) er gerð grein fyrir þeirri mæli- og stjórnunaraðferð sem á íslensku hefur ýmist verið kölluð samhæft árangursmat eða stefnumiðað árangursmat (Balanced Scorecard) og bent á hvernig ríkisaðilar geti nýtt sér hana til að ná markmiðum sínum og meta árangur starfa sinna. [meira]
Flugmálastjórn Íslands
Flugöryggi hér á landi hefur aukist talsvert undanfarin ár vegna nýrra alþjóðlegra reglna og betra eftirlits Flugmálastjórnar. Nauðsynlegt er hins vegar að tryggja að flugþjónusta bíði ekki skaða vegna vinnudeilna flugumferðarstjóra og ríkisins. Þá mætti kanna hvort ekki væri heppilegt að færa starfsmannahald undir flugmálastjóra til að skapa meiri einingu innan stofnunarinnar. Á sama hátt má telja eðlilegt að málefni Keflavíkurflugvallar heyri undir Flugmálastjórn og samgönguráðuneytið en lúti ekki sérstakri stofnun utanríkisráðuneytisins, Flugmálastjórn á Keflavíkurflugvelli. Að lokum er mikilvægt að sömu leikreglur gildi um Flugmálastjórn og um aðrar A-hluta stofnanir ríkisins um tilflutning á samþykktum fjárveitinga milli viðfangsefna. [meira]
Sólheimar í Grímsnesi
Ríkisendurskoðun hefur sent frá sér nýja skýrslu um þjónustuheimili fatlaðra að Sólheimum í Grímsnesi, (apríl 2003). Þar er greint frá niðurstöðum úttektar á því hvernig forsvarsmenn Sólheima ráðstöfuðu framlögum ríkisins til stofnunarinnar á árunum 1996-1999. Fram kemur að fjármunum hefur að verulegu leyti verið varið á annan hátt en kveðið er á um í þjónustusamningi Félagsmálaráðuneytis og Sólheima frá 1996. Ríkisendurskoðun telur að stjórnvöldum beri að kanna hvaða þýðingu þetta hefur þegar horft er til réttinda og skyldna samningsaðila. [meira]
Tölvukerfi sýslumannsembætta
Fjöldi sýslumannsembætta hér á landi og verksvið þeirra hafa haldist nær óbreytt í hálfa öld. Á sama tíma hefur orðið stórfelld bylting í upplýsingatækni sem breytir á margan hátt starfsskilyrðum embættanna og opnar þeim nýjar leiðir til að mæta betur þörfum almennings og vinna verk sín á hagkvæmari og skilvirkari hátt en áður. Um leið skiptir miklu máli að öryggis sé gætt við beitingu þessarar tækni. Í skýrslu Ríkisendurskoðunar, Tölvukerfi sýslumannsembætta. Úttekt á upplýsingakerfum (mars 2003), er farið í saumana á tölvumálum 26 sýslumannsembætta, jafnframt því sem bent er á ýmsa vannýtta möguleika upplýsingatækninnar. [meira]
Kennitölur um umsvif og árangur
Ríkisendurskoðun hefur sent frá sér leiðbeiningarritið Kennitölur um umsvif og árangur. Stefnumiðað árangursmat í ríkisrekstri. Ritið er hugsað sem innlegg í þá umræðu hvernig hægt sé að fylgjast með og stjórna rekstri ríkisstofnana og fyrirtækja með árangursmælikvörðum. Í því samhengi var einnig horft til þeirrar ákvörðunar fjármálaráðuneytisins að auka notkun slíkra mælikvarða við fjárlagagerð. [meira]
Siðareglur Ríkisendurskoðunar
Á síðustu árum hefur verið unnið að því víða um lönd að móta siðareglur fyrir starfsmenn ríkisins, einstakar stofnanir þess og starfsstéttir. Slíkar reglur miða að því að efla vitund starfsmanna um siðferðilegar skyldur sínar og ábyrgð gagnvart þeirri stofnun sem þeir starfa við, umbjóðendum sínum og öllum almenningi. Í þeim siðareglum sem Ríkisendurskoðun hefur sett starfsfólki sínu og hér birtast er lögð áhersla á eftirfarandi þætti: Traust, trúverðugleika, óhæði, hlutleysi, trúnað og fagmennsku. [meira]