Fréttir frá árinu 2004
Skógrækt. Lagaumhverfi Skógræktar ríkisins og landshlutabundinna skógræktarverkefna
Ríkisendurskoðun telur tímabært að huga að setningu nýrra skógræktarlaga og skapa heildstæða stefnu um skógvernd og skógrækt á vegum hins opinbera. Þá bendir stofnunin á að áætlanir stjórnvalda um að klæða 5% láglendis skógi á 40 árum standist ekki nema með auknum fjárframlögum og að nauðsynlegt sé að uppfæra áætlanirnar til samræmis við veruleikann. [meira]
Náttúrufræðistofnun. Rekstrar- og fjárhagsvandi
Stjórnvöld eiga tveggja kosta völ til að leysa alvarlegan rekstrar- og fjárhagsvanda Náttúrufræðistofnunar Íslands. Að laga starfsemi hennar að núverandi fjárhagsramma með verulegum niðurskurði í rekstri eða að auka fjárveitingar til hennar svo að hún geti sinnt þeim verkefnum sem henni eru falin í lögum með svipuðum hætti og undanfarin ár. [meira]
Endurskoðun ríkisreiknings 2003
Í skýrslu Ríkisendurskoðunar "Endurskoðun ríkisreiknings 2003" er gerð grein fyrir afkomu og fjárhagsstöðu ríkissjóðs á árinu 2003 og endurskoðun á efnahag ríkisins, ríkissjóðstekjum, ráðuneytum, stofnunum og öðrum fjárlagaliðum. Auk þess er fjallað um fjárheimildir ríkissjóðs og fjárhagsstöðu einstakra aðila gagnvart þeim í árslok 2003. [meira]
Sigurður Þórðarson: Innleiðing alþjóðlegra reikningsskilastaðla á Íslandi
Frá og með 1. janúar 2005 verða öll félög sem skráð hafa hlutabréf sín í kauphöllum innan Evrópusambandsins að ganga frá samstæðureikningsskilum sínum samkvæmt stöðlum Alþjóða reikningsskilaráðsins (IAS, IFRS). Í samræmi við lög og bókanir um Evrópska efnahagssvæðið nær þetta einnig til íslenskra félaga. [meira]
Morgunmálþing: Opinber stjórnun og stjórnsýsluumbætur í Bretlandi: Aðferðir, árangur og helstu viðfangsefni í dag
Fimmtudaginn 16. september nk. flytur Sir John Bourn ríkisendurskoðandi Bretlands og gestaprófessor við London School of Economics, fyrirlestra á morgunmálþingi, um opinbera stjórnun og stjórnsýsluumbætur í Bretlandi. Málþingið verður haldið á Grand-hótel í Reykjavík. Húsið opnar kl. átta, en dagskráin hefst uppúr hálf níu og lýkur um kl. 10.30. Að málþinginu standa Félag forstöðumanna ríkisstofnana, Ríkisendurskoðun og Stofnun stjórnsýslufræða og stjórnmála við Háskóla Íslands. Málþingið fer fram á ensku, er opið öllu áhugafólki um stjórnsýslu meðan rými leyfir og er aðgangur ókeypis. Málþingsstjóri verður Páll Skúlason háskólarektor. [meira]
Fjórðungssjúkrahúsið á Akureyri. Stjórnsýsluendurskoðun
Fjórðungssjúkrahúsið á Akureyri stenst fyllilega samanburð við Landspítala -- háskólasjúkrahús og hliðstæð bresk sjúkrahús þegar metin eru afköst og gæði þeirrar þjónustu sem veitt er. Uppbygging á húsnæði sjúkrahússins hefur hins vegar verið ómarkviss undanfarin ár og almannafé illa nýtt. Þá hefur ekki tekist að halda kostnaði við rekstur sjúkrahússins innan ramma fjárlaga. [meira]
Svar við athugasemdum fjármálaráðuneytis vegna skýrslu
Fjármálaráðuneytið hefur gert nokkrar athugasemdir við skýrslu Ríkisendurskoðunar um framkvæmd fjárlaga árið 2003, en skýrslan kom út í lok júní 2004. Athugasemdir ráðuneytisins koma m.a. fram í bréfi þess til stofnunarinnar þann 15. júlí sl. Eftir útkomu skýrslunnar hefur nokkur umræða orðið í fjölmiðlum um efni hennar. Hefur fjármálaráðherra komist svo að orði við fjölmiðla að meðferð talna í skýrslunni sé ónákvæm, auk þess sem ýmislegt í framsetningu hennar sé villandi og óheppilegt. Af þessu tilefni telur Ríkisendurskoðun ástæðu til að fjalla nokkuð um athugasemdir ráðherra og ráðuneytisins.Svar til fjármálaráðaneytisGreinagerð fjármálaráðaneytis [meira]
Framkvæmd fjárlaga árið 2003
Í skýrslu Ríkisendurskoðunar um framkvæmd fjárlaga ársins 2003 er bent á mikilvægi þess að ráðuneyti og stofnanir ríkisins virði fjárlög, að farið sé í saumana á fjármálum og rekstri þeirra stofnana sem reknar hafa verið með halla á undanförnum árum og að verklag ráðuneyta við eftirfylgni fjárlaga sé samræmt betur. [meira]
Háskólamenntun. Námsframboð og nemendafjöldi
Í skýrslu Ríkisendurskoðunar um námsframboð og nemendafjölda við háskóla er lagt til að yfirvöld menntamála móti opinbera og áþreifanlega heildarstefnu um háskólastigið þar sem verkefnum er forgangsraðað, þau tímasett og mælanleg markmið skilgreind. [meira]
Viðbótarlaun. Úttekt í framhaldi af endurskoðun ríkisreiknings 2002
Í skýrslu Ríkisendurskoðunar "Viðbótarlaun. Úttekt í framhaldi af endurskoðun ríkisreiknings 2002" kemur fram að greiðslur fyrir ómælda yfirvinnu er helsta birtingarform viðbótarlauna hjá stofnunum og fyrirtækjum ríkisins. Einungis nokkur hluti ríkisstarfsmanna fær slíkar greiðslur og þá einkum þeir sem eru hæst settir í stofnunum. Karlar fá í flestum tilvikum mun hærri viðbótarlaun en konur. Munur kynjanna er minnstur hjá háskólamenntuðum stjórnendum. [meira]
Ársskýrsla Ríkisendurskoðunar 2003
Ríkisendurskoðun hefur gefið út ársskýrslu sína fyrir árið 2003. Þar er m.a. gerð grein fyrir hlutverki stofnunarinnar og starfsemi hennar og árangri á síðasta ári. Þá fylgir með listi yfir þau rit sem Ríkisendurskoðun gaf út árið 2003, siðareglur stofnunarinnar og sundurliðaður ársreikningur. [meira]
Ísland og Ospar. Umhverfisendurskoðun
Ríkisendurskoðun telur að íslensk stjórnvöld hafi staðið vel að því að innleiða Samning um verndun Norðaustur-Atlantshafsins í íslenskan rétt og fylgja honum eftir hér á landi. Erfiðara er að meta raunverulegan árangur af þessu starfi þar sem löggjöf um varnir gegn mengun hafsins snerta einnig ýmsa aðra mikilvæga þjóðréttarsamninga sem Ísland er aðili að. [meira]
Lyfjakostnaður. Notkun, verð og framboð lyfja á Íslandi
Árið 2003 nam lyfjakostnaður hér á landi um 14 milljörðum kr. með virðisaukaskatti. Ef hver Íslendingur hefði greitt jafnmikið fyrir lyf og Danir og Norðmenn gerðu að meðaltali þetta ár hefði þessi kostnaður orðið 4,4 milljörðum kr. lægri. [meira]
Launaþróun starfsmanna nokkurra heilbrigðisstofnana 2000-2002
Launakostnaður nokkurra heilbrigðisstofnana á landsbyggðinni óx um 30,2% á árunum 2000-2002 og eru launatengd gjöld þá ekki talin með. Þetta er u.þ.b. tvöfalt meiri hækkun en launavísitala sama tímabils segir til um. Skýringarnar eru einkum þrjár. Í fyrsta lagi miklar umsamdar launahækkanir til sumra starfshópa, í öðru lagi launaskrið og í þriðja lagi aukið vinnuafl. [meira]
Dvalarheimilið Höfði, Akranesi. Rekstur og fjárhagsstaða árin 2000-2002
Fjárhags- og stjórnsýsluúttekt Ríkisendurskoðunar á Dvalarheimilinu Höfða á Akranesi leiðir í ljós að stofnunin sker sig ekki sérstaklega frá öðrum öldrunarheimilum þegar horft er til afkomu. Yfirleitt er halli á rekstri þeirra. Frá árinu 2000 hefur kostnaður Höfða þó hækkað meira en annarra sambærilegra heimila, einkum vegna launahækkana. [meira]
Umhverfisendurskoðun í hnotskurn. Hlutverk Ríkisendurskoðunar á sviði umhverfisendurskoðunar
Umhverfisendurskoðun er tiltölulega ný grein innan endurskoðunar. Hún tók fyrst að þróast fyrir um 25 árum í tengslum við vitundarvakningu almennings, fyrirtækja og stjórnvalda um að hugað sé að umhverfisáhrifum af starfsemi fyrirtækja og opinberra stofnana og að lagt sé óháð mat á árangur þeirra. Við umhverfisendurskoðun ríkisendurskoðenda er einkum leitast við að kanna hvernig lögum um umhverfismál er framfylgt og meta hagkvæmni þeirra og þann árangur sem þau leiða af sér, bæði umhverfislegan og fjárhagslegan. Með þessu móti fást í senn mikilvægar upplýsingar um stefnu stjórnvalda og einstakra opinberra stofnana og fyrirtækja í umhverfismálum og um stöðu þessa málaflokks. Allar líkur eru á því að umhverfisendurskoðun fái aukið vægi hér á landi á komandi árum, bæði hjá hinu opinbera og í einkageiranum, og því hyggst Ríkisendurskoðun leggja aukna áherslu á þennan þátt starfsemi sinnar. [meira]
Sigurður Þórðarson: Hvað ber að varast
Í þessari grein fjallar Sigurður Þórðarson, ríkisendurskoðandi, um hlutverk endurskoðenda á þeim áhættutímum sem nú eru í mörgum fyrirtækjum og stofnunum ríkisins. Jafnframt bendir hann á ýmsa áhættuþætti sem fylgir rekstri þeirra og hvernig best megi bregðast við þeim.Greinin var upphaflega birt í fréttablaði Félags löggiltra endurskoðenda, FLE-fréttum, 26. árgangi 3. tölublaði (desember 2003). [meira]