Fréttir frá árinu 2006
Endurskoðun ríkisreiknings 2005
Við endurskoðun ríkisreiknings fyrir árið 2005 ítrekar Ríkisendurskoðun mikilvægi þess að framkvæmd fjárlaga ríkisins styðjist við lagaákvæði. Þá leggur stofnunin áherslu á að ríkisstofnanir vinni í anda áhættustjórnunar og efli innra eftirlit hjá sér. [meira]
Íbúðalánasjóður. Fjárhagsstaða
Ólíklegt er að eiginfjárhlutfall Íbúðalánasjóðs stefni niður fyrir áskilin hlutföll í fyrirsjáanlegri framtíð. Vegna þessa er líka ólíklegt að reyna muni á ríkisábyrgð á skuldbindingum sjóðsins. [meira]
Ríkislögreglustjóri. Stjórnsýsluúttekt
Frá því að embætti ríkislögreglustjóra var stofnað árið 1997 hefur það stuðlað að margvíslegum framförum innan lögreglunnar og beitt sér fyrir ýmsum nýjungum til að bregðast við breyttu eðli og umfangi afbrota hér á landi. Í skipulagi og starfi embættisins má þó benda á nokkur atriði sem betur mættu fara og huga þarf að á komandi árum. [meira]
Athugasemdir við gagnrýni Umhverfisstofnunar á stjórnsýsluúttekt um stofnunina
Davíð Egilson, forstjóri Umhverfisstofnunar, hefur í fréttatilkynningu, dagsettri 11. október 2006 gert „verulegar athugasemdir við aðferðir og framkvæmd‘‘ stjórnsýsluúttektar Ríkisendurskoðunar á Umhverfisstofnun, svo að vitnað sé í fréttatilkynninguna. Í tilefni þess vill Ríkisendurskoðun koma eftirfarandi sjónarmiðum á framfæri. [meira]
Umhverfisstofnun. Stjórnsýsluúttekt
Meginmarkmið stjórnvalda með stofnun Umhverfisstofnunar hafa einungis að hluta til náð fram að ganga. Fyrir þessu eru aðallega tvær ástæður: Annars vegar hafa umhverfisráðuneytið og Umhverfisstofnun ekki verið nægjanlega samstiga í afstöðu sinni til forgangsröðunar þeirra málefna sem stofnunin sinnir. Hins vegar hefur stofnunin ekki nýtt sér til fullnustu möguleika sína að ná fram aukinni hagkvæmni, svo sem með auknu samstarfi sviða og markvissu verkbókhaldi. [meira]
Breyting ríkisaðila í hlutafélag
Með leiðbeiningum sínum "Breyting ríkisaðila í hlutafélag. Lagaákvæði og reikningsskilareglur við gerð sérfræðiskýrslu skv. 6. gr. hlutafélagalaga" vill Ríkisendurskoðun leggja sitt af mörkum við að tryggja að mat á eignum og skuldum ríkisaðila sem breytt er í hlutafélög og Ríkisendurskoðun er falið að gera sérfræðiskýrslu um sé unnið með skipulegum og samræmdum hætti. [meira]
Stjórnarfundur EUROSAI í Reykjavík
Samtök evrópskra ríkisendurskoðunarstofnana (EUROSAI) héldu 31. stjórnarfund sinn í Reykjavík hinn 11. september í ár (2006). Fundurinn var haldinn í boði Ríkisendurskoðunar og var þar m.a. rætt um starfsemi samtakanna á síðasta ári og framtíðarverkefni þeirra. [meira]
Aðgengisstefna Ríkisendurskoðunar
Ríkisendurskoðun hefur nú á þessu ári gert ýmsar breytingar á heimasíðu stofnunarinnar til að auðvelda fötluðum að ferðast um hana og nota það efni sem þar er birt. Í tengslum við þessar breytingar hefur stofnunin einnig mótað sér aðgengisstefnu sem hér er kynnt. Aðgengisstefnan er einnig birt meðal stefnumála stofnunarinnar. [meira]
Framkvæmd fjárlaga árið 2005
Í skýrslu Ríkisendurskoðunar um framkvæmd fjárlaga fyrir árið 2005 er enn og aftur bent á mikilvægi þess að ráðuneyti og stofnanir ríkisins virði fjárlög. Í árslok 2005 hafði ríflega fjórðungur fjárlagaliða ráðstafað fjármunum umfram heimildir og á sama tíma áttu tæplega tveir þriðju allra fjárlagaliða inneign hjá ríkissjóði. Ríkisendurskoðun hefur ítrekað bent á að mikil frávik frá fjárlögum ár eftir ár séu til marks um meira agaleysi í fjárlagagerð og framkvæmd fjárlaga hér á landi en tíðkast í löndum sem Ísland er gjarnan borið saman við. [meira]
Hvalfjarðargöngin og Sundabraut. Mat á kostum og göllum einkaframkvæmdar
Í þessari greinargerð er fjallað um kosti þess og galla að láta einkaaðila en ekki ríkið sjá um gerð og rekstur samgöngumannvirkja. Jafnframt er rifjað upp hvernig staðið var að undirbúningi og gerð Hvalfjarðarganga og sú reynsla sem þar fékkst notuð til að meta væntanleg áform um gerð Sundabrautar. [meira]
Sigurður Þórðarson: Vænlegt til árangurs
Hér er birt erindi Sigurðar Þórðarsonar "Vænlegt til árangurs" sem flutt var fimmtudaginn 18. maí 2006 á ráðstefnunni Framsækinn ríkisrekstur - árangursstjórnun í tíu ár. Ráðstefnan var haldin á vegum fjármálaráðuneytisins í tilefni þess að tíu ár eru nú liðin síðan hafin var innleiðing árangursstjórnunar í ríkisrekstri hér á landi. [meira]
Vísbendingar um fjármálamisferli
Ríkisendurskoðun hefur sent frá sér leiðbeiningarritið "Vísbendingar um fjármálamisferli" (maí 2006). Því er ætlað að auka þekkingu og skilning á helstu einkennum fjármálamisferla og hvað sé líklegt til að koma í veg fyrir eða upplýsa slík mál innan stofnana og fyrirtækja ríkisins. Ritið tekur annars vegar mið af reynslu Ríkisendurskoðunar við að fást við mál af þessu tagi á undanförnum árum og hins vegar af erlendum könnunum á þessu sviði. [meira]
Athugasemdir vegna nýrra gagna um sölu á hlut ríkisins í Búnaðarbankanum
Ríkisendurskoðun hefur sent formanni fjárlaganefndar athugasemdir sínar við ummæli Vilhjálms Bjarnasonar, aðjúnkts við Háskóla Íslands, um sölu á hlut ríkisins í Búnaðarbankanum til svonefnds S-hóps, m.a. þau að útilokað sé að Hauck & Aufhäuser bankinn hafi verið eigandi að helmingshlut í Eglu hf. [meira]
Ársskýrsla Ríkisendurskoðunar 2005
Út er komin Ársskýrsla Ríkisendurskoðunar fyrir árið 2005. Þar er m.a. gerð grein fyrir verkefnum stofnunarinnar og helstu markmiðum, starfseminni árið 2005 og völdum lykiltölum í rekstri. Þá horfir ríkisendurskoðandi yfir farinn veg, auk þess sem fjórir starfsmenn stofnunarinnar lýsa hlutverki stofnunarinnar, aðferðum og verklagi við endurskoðun. [meira]
Verkmenntaskóli Austurlands. Fjármál og rekstur 2002-2005
Hallarekstur Verkmenntaskóla Austurlands á árunum 2002-2003 má fyrst og fremst rekja til þess að kennslumagn skólans miðaðist við mun fleiri nemendur en stunduðu nám við hann á þessum árum. Frá árinu 2004 hefur skólanum tekist að nýta starfsfólk og aðstöðu betur og sníða starfsemi sína að fjárframlögum. [meira]
Samningurinn um líffræðilega fjölbreytni. Umhverfisendurskoðun
Upphaflegar væntingar og markmið Alþingis með aðild Íslands að Samningnum um líffræðilega fjölbreytni hafa ekki gengið eftir. Þá hafa náttúrufræðilegar rannsóknir hér á landi ekki verið efldar nægjanlega frá gerð samningsins í því skyni að kanna líffræðilega fjölbreytni Íslands. Mikilvægt er að Alþingi skoði vandlega hvort hægt sé að styrkja stöðu þessa málaflokks. [meira]