Þjóðskrá Íslands
Sjúkraflug á Íslandi
Þjónustusamningar við öldrunarstofnanir
Reiknilíkan heilbrigðisstofnana
Verkefni fyrrum Varnarmálastofnunar
Skipulagsgjald
Eftirfylgniúttektir
Matvælastofnun
Samningamál ríkisins
Sameining ríkisstofnana
Innkaupamál ríkisins
Þjóðskrá Íslands
Ástæða úttektar
Úttektin er unnin að beiðni innanríkisráðuneytis sem óskaði eftir að mat yrði lagt á hvernig rekstur Þjóðskrár Íslands hefur gengið eftir að Fasteignaskrá Íslands og Þjóðskrá voru sameinaðar í eina stofnun hinn 1. júlí 2010, sbr. lög nr. 77/2010.
Lýsing
Við úttektina er byggt á lögum, reglum, ársreikningum og upplýsingum frá Þjóðskrá Íslands og innanríkisráðuneyti. Jafnframt verður eftir atvikum rætt við starfsmenn stofnunarinnar og ráðuneytisins.
Markmið
Markmið úttektarinnar er að kanna hvort fagleg og fjárhagsleg markmið sameiningar Fasteignaskrár Íslands og Þjóðskrár hafi gengið eftir, hvernig stofnuninni gengur að sinna einstökum verkefnum sínum með tekjum af gjaldskrá og framlagi ríkissjóðs og hvort skipulag, stjórnun og innri ferlar stofnunarinnar stuðli að gagnsæi í rekstri og því að hún sinni lögboðnu hlutverki sínu á hagkvæman, skilvirkan og árangursríkan hátt.
Útgáfa
Stefnt er að því að birta niðurstöður úttektarinnar í opinberri skýrslu til Alþingis í lok júní 2013.
Sjúkraflug á Íslandi
Ástæða úttektar
Í febrúar hóf Ríkisendurskoðun forkönnun á útboði Ríkiskaupa fyrir hönd Sjúkratrygginga Íslands á kaupum á sjúkraflutningaþjónustu á Íslandi (útboð nr. 15327). Tafir urðu á útboði sjúkraflutningaþjónustu á árinu 2012 vegna mögulegrar aðkomu Landhelgisgæslunnar að sjúkraflugi auk þess sem þessi aðkoma virðist hafa haft áhrif á útboðsskilmálana, m.a. samningstíma.
Lýsing
Við úttektina verður stuðst við á lög og reglugerðir um Landhelgisgæsluna, opinber innkaup, útvistun o.fl. og upplýsingar frá velferðarráðuneyti, innanríkisráðuneyti, fjármála- og efnahagsráðuneyti, Landhelgisgæslunni, Sjúkratryggingum Íslands og Ríkiskaupum.
Markmið úttektarinnar
Markmið úttektarinnar er að kanna nánar hugmyndir um aðkomu Landhelgisgæslunnar að sjúkraflugi og hvaða áhrif þetta hafði á útboð nr. 15327.
Útgáfa
Stefnt er að því að birta niðurstöður úttektarinnar í opinberri skýrslu til Alþingis í júní 2013.
Þjónustusamningar við öldrunarstofnanir
Ástæða úttektar
Árið 2011 gerði Ríkisendurskoðun úttekt á skuldbindandi samningum velferðarráðuneytis. Í ljós kom að aðeins voru til örfáir þjónustusamningar við öldrunarstofnanir þrátt fyrir að þær séu fjölmargar. Nokkrir samninganna voru auk þess útrunnir og höfðu ekki verið endurnýjaðir. Í svörum ráðuneytisins við spurningum Ríkisendurskoðunar um samningamálin kom fram að unnið væri að umbótum á því sviði. Ríkisendurskoðun ákvað því að gera úttekt á núverandi stöðu þjónustusamninga við öldrunarstofnanir.
Lýsing
Úttektin er byggð á gögnum um tiltæka þjónustusamninga við öldrunarstofnanir og gildistíma þeirra, fjölda öldrunarheimila sem fá greitt fyrir rekstur sinn með daggjöldum fyrir heimilismenn og öðrum gögnum eftir því sem við á. Einnig verður rætt við starfsmenn velferðarráðuneytis og Sjúkratrygginga Íslands.
Umfang, afmörkun og markmið
Markmið úttektarinnar er að kanna hver staðan er á gerð þjónustusamninga við öldrunarstofnanir, hvað stofnanirnar séu margar, hversu margir samningar hafi verið gerðir og hversu margir séu í gildi.
Útgáfa
Stefnt er að því að birta niðurstöðu úttektarinnar í opinberri skýrslu til Alþingis í maí 2013.
Reiknilíkan heilbrigðisstofnana
Ástæða úttektar
Undanfarin misseri hefur hefur nokkuð verið rætt um rekstrarstöðu heilbrigðisstofnana á landsbyggðinni. Í skýrslu Ríkisendurskoðunar Skýrsla um eftirfyglni: Heilbrigðisstofnun Austurlands (2009) kemur fram að sjö af samtals ellefu slíkum stofnunum voru reknar með halla árið 2011. Vegna þessa ákvað Ríkisendurskoðun að gera úttekt á reiknilíkani því sem velferðarráðuneytið notar til að ákveða framlag ríkissjóðs til heilbrigðisstofnana.
Lýsing
Úttektin er m.a. byggð á fjárlagafrumvörpum, fjárlögum og gögnum og upplýsingum frá velferðarráðuneyti og heilbrigðisstofnunum á landsbyggðinni. Jafnframt verður eftir atvikum rætt við starfsmenn ráðuneytisins og stofnananna.
Markmið
Markmið úttektarinnar er annars vegar að kanna hvernig velferðarráðuneyti notar reiknilíkanið við að ákvarða og rökstyðja á hlutlægan og gagnsæjan hátt fjárframlög til einstakra stofnana. Hins vegar verður hugað að tengslum reiknilíkansins við þau faglegu og fjárhagslegu markmið stjórnvalda sem birtast í fjárlögum hvers árs, rekstraráætlanir stofnana og loks endanlegar rekstrarniðurstöður þeirra samkvæmt ársreikningum.
Útgáfa
Stefnt er að því að birta niðurstöðu úttektarinnar í opinberri skýrslu til Alþingis í maí 2013.
Verkefni fyrrum Varnarmálastofnunar
Ástæða úttektar
Varnarmálastofnun var lögð niður með lögum nr. 98/2010 um breytingu á Varnarmálalögum þann 28. júní 2010. Verkefni fyrrum Varnarmálastofnunar eru engu að síður enn fyrir hendi og eftir lagabreytinguna tóku Landhelgisgæsla Íslands, Ríkislögreglustjóri og utanríkisráðuneyti við þeim. Um miðjan nóvember 2012 hóf Ríkisendurskoðun forkönnun á fyrirkomulagi verkefnanna eftir að stofnunin hafði verið lögð niður.
Lýsing
Úttektin er byggð á gögnum frá utanríkis- og innanríkisráðuneyti, frumvörpum og lögum um varnarmál og umræður þeim tengdum á Alþingi, viðtölum við stjórnendur þeirra stofnana sem tóku við verkefnunum o.fl.
Markmið
Meginmarkmið úttektarinnar er að kanna hvernig tekist hefur að koma á þeirri hagræðingu sem að var stefnt með tilfærslu verkefna Varnarmálastofnunar til annarra opinberra stofnana í kjölfar breytinga á varnarmálalögum.
Útgáfa
Stefnt er að því að birta niðurstöður úttektarinnar í opinberri skýrslu til Alþingis í júní 2013.
Skipulagsgjald
Ástæða úttektar
Við umfjöllun Alþingis árið 2010 um frumvarp til nýrra skipulagslaga (sem síðar varð að lögum nr. 123/2010) kom fram að endurskoða þyrfti ákvæði laganna um skipulagsgjald. Umhverfis- og auðlindaráðuneytið hefur haft málið til skoðunar síðan en þar sem umrædd ákvæði hafa enn ekki verið endurskoðuð ákvað Ríkisendurskoðun að skoða framkvæmd álagingar og innheimtu skipulagsgjalds.
Lýsing
Úttektin byggir m.a. á upplýsingum og gögnum frá Þjóðskrá, Skipulagsstofnun, og byggingafulltrúum sveitarfélaga og annarra sem koma með beinum eða óbeinum hætti að álagningu eða framkvæmd skipulagsgjalds.
Markmið
Meginmarkmið úttektarinnar er að kanna framkvæmd álagningar og innheimtu skipulagsgjalds og leggja fram tillögur til úrbóta ef þörf er á.
Útgáfa
Stefnt er að því að birta niðurstöður úttektarinnar í nóvember 2012.
Eftirfylgniúttektir Ríkisendurskoðunar
Ástæða úttekta
Í samræmi við alþjóðlega staðla um stjórnsýsluendurskoðun (ISSAI 3100) eru eftirfylgniúttektir snar þáttur í starfsemi Ríkisendurskoðunar og því ferli sem stofnunin fylgir í störfum sínum (sbr. Vinnuferli stjórnsýsluúttekta). Með slíkum úttektum leitast stofnunin við að kanna á hlutlægan og sjálfstæðan hátt afdrif þeirra ábendinga um úrbætur sem hún setur fram í stjórnsýsluúttektum sínum og meta hvort brugðist hafi verið við þeim með viðhlítandi hætti.
Markmið úttekta
Með eftirfylgniúttektum sínum leitast Ríkisendurskoðun við að auka áhrif stjórnsýsluúttekta sinna með því að minna á meginniðurstöður þeirra, athugasemdir og ábendingar og ítreka þær eða árétta ef þörf þykir. Um leið eru úttektirnar mikilvægur þáttur í innra gæðaeftirliti og gæðamati Ríkisendurskoðunar, þ.e. eigin mati hennar á því hvort ábendingar stofnunarinnar séu réttmætar og raunhæfar og stuðli að raunverulegum úrbótum. Á þann hátt eru þær liður í að bæta vinnubrögð við stjórnsýsluendurskoðun.
Lýsing úttekta
Eftirfylgniúttektir eru að jafnaði gerðar um það bil þremur árum eftir að stjórnsýsluúttektum lýkur og felast í sjálfstæðri könnun og mati á þeim upplýsingum og gögnum sem málið varða. Ævinlega er leitað til þess ráðuneytis eða þeirrar stofnunar sem í hlut á og óskað eftir greinargerð þeirra um það hvort ábendingar Ríkisendurskoðunar hafi orðið tilefni til breytinga og þá hverra. Eftir föngum er jafnframt hugað að opinberum gögnum, m.a. tölulegum upplýsingum.
Útgáfa
Niðurstöður Ríkisendurskoðunar og viðbrögð ráðuneytis eða stofnunar við þeim eru settar fram í sérstökum skýrslum sem sendar eru Alþingi og birtar á heimasíðu Ríkisendurskoðunar.
Árið 2012
Árið 2012 hefur Ríkisendurskoðun sent frá sér eftirfarandi eftirfylgniúttektir vegna skýrslna frá árinu 2009:
Skýrsla um eftirfylgni: Útflutningsaðstoð og landkynning (apríl)
Skýrsla um eftirfylgni: Lyfjastofnun (maí)
Skýrsla um eftirfylgni: Íslensk muna- og minjasöfn (júní)
Skýrsla um eftirfylgni: Heilbrigðisstofnun Austurlands (september)
Skýrsla um eftirfylgni: Innheimta sekta- og sakarkostnaðar (október)
Matvælastofnun
Ástæða úttektar
Frá árinu 2011 hefur úttekt á Matvælastofnun verið á verkefnalista Ríkisendurskoðunar. Í febrúar 2012 barst stofnuninni beiðni frá Landssamtökum sauðfjárbænda um stjórnsýsluúttekt á Matvælastofnun. Forkönnun hófst í maí 2012 og að henni lokinni var ákveðið að hefja aðalúttekt á tilteknum þáttum í stjórnsýslu stofnunarinnar.
Lýsing
Úttektin byggir m.a. á upplýsingum og gögnum frá Matvælastofnun, atvinnuvega- og nýsköpunarráðuneyti og ýmsum eftirlitsþegum og samtökum þeirra. Einnig verður gerð viðhorfskönnun meðal eftirlitsþega og samtaka
þeirra.
Markmið
Markmið úttektarinnar er einkum að leita svara við því hvort samræmi sé milli yfirlýsts hlutverks og starfshátta Matvælastofnunar, hvort verklag sé skýrt og samræmt, hvort samskipti og samráð við eftirlitsþega og samtök þeirra séu fullnægjandi og hvort ákvarðanir stofnunarinnar séu markvissar og vel rökstuddar.
Útgáfa
Stefnt er að því að birta niðurstöður úttektarinnar í maí 2013.
Samningamál ríkisins
Ástæða úttektar
Í úttektum sínum hefur Ríkisendurskoðun iðulega orðið þess áskynja að bæta þurfi meðferð samninga sem einstök ráðuneyti og stofnanir þeirra gera við einkaaðila, samtök eða sveitarfélög um tiltekin verkefni. Í mörgum tilvikum hefur verið unnið árum saman samkvæmt útrunnum samningum og eins hefur verið misbrestur á því að fylgt hafi verið eftir ákvæðum þeirra, t.d. um uppgjör fjárhags- og þjónustuskuldbindinga. Ríkisendurskoðun vann úttekt á skuldbindandi samningum einstakra ráðuneyta og birti í átta skýrslum á tímabilinu desember 2011 til mars 2012. Niðurstöðurnar vörpuðu ljósi á brotalamir í eftirliti með framkvæmd samninga og hyggst Ríkisendurskoðun efla eftirlit sitt með samningamálum ríkisins í kjölfarið.
Lýsing
Fyrsti áfangi verkefnisins er að útbúa yfirlit um þá samninga sem gerðir hafa verið. Lögð verður áhersla á að útvega afrit af samningunum og upplýsingar um gildistíma þeirra, kostnað og helstu þætti eftirlitshlutverks ríkisaðila. Að því loknu mun Ríkisendurskoðun fylgja samningunum eftir með reglubundnum hætti, þ.m.t. hvort og hvernig unnið er að framlengingu eða endurnýjun samninga þegar gildistími þeirra rennur út, með hvaða hætti eftirlit með framkvæmd samninga fer fram og hvernig þeir eru gerðir upp. Í þessu sambandi mun Ríkisendurskoðun einnig gera sérstaktar úttektir á einstökum samningum eða flokkum samninga eftir því sem þörf þykir.
Markmið úttektar
Með úttektinni er leitast við að fá yfirsýn um stöðu og umfang samningamála ríkisins, m.a. fjölda samninga og skuldbindingar sem í þeim felast. Þá mun Ríkisendurskoðun leggja áherslu á að fylgja því eftir að gildir samningar séu til um þau verkefni sem ríkið greiðir fyrir og að eftirlit þeirra sé skilvirkt. Á þann hátt vill Ríkisendurskoðun leggja sitt af mörkum við að bæta meðferð samninga ríkisins, auka eftirlit og eftirfylgni með samningum og koma þannig í veg fyrir að verksalar fái greitt fyrir verk sem eru illa framkvæmd eða þjónustu sem er ekki veitt.
Útgáfa
Ríkisendurskoðun gerir ráð fyrir að birta afrakstur vinnu sinnar í nokkrum stuttum skýrslum. Munu þær bæði varða yfirsýn um samningamál almennt og framkvæmd einstakra samninga.
Sameining ríkisstofnana
Stjórnvöld hafa kynnt áform um að endurskipuleggja opinbera þjónustu og sameina stofnanir á næstu árum. Í samræmi við lögbundið hlutverk sitt hefur Ríkisendurskoðun ákveðið fylgjast með því hvernig þessi áform ganga fram og meta hvernig til tekst.
Verkefnið flokkast undir svokallað samtímaeftirlit. Í því felst að fylgjast með stjórnun og rekstri ríkisins í samtíma í stað þess að gera úttekt eftir á, jafnvel að nokkrum árum liðnum, eins og hingað til hefur verið venjan í starfsemi stofnunarinnar.
Útbúinn hefur verið listi með spurningum sem beint verður til ráðuneyta og stýrihópa (sjá hlekk). Þær lúta í senn að undirbúningi og framkvæmd fyrirhugaðra breytinga og fela í sér þau árangursviðmið sem stofnunin mun horfa til við matið.
Spurningalistinn verður sendur fyrrnefndum aðilum þegar formleg ákvörðun um sameiningu liggur fyrir eða þegar lög þar um hafa verið samþykkt á Alþingi. Ríkisendurskoðun mun vinna úr svörunum og öðrum upplýsingum og birta þau og niðurstöður sínar jafnóðum í opinberum skýrslum.
Gögn tengd verkefninu:
Sameining í ríkisrekstri – 6. Embætti landlæknis
Sameining í ríkisrekstri – 5. Velferðarráðuneyti
Sameining í ríkisrekstri – 4. Innanríkisráðuneyti
Sameining í ríkisrekstri – 3. Eitt félag um flugleiðsögu og flugvallarekstur
Sameining í ríkisrekstri – 2. Myndun Þjóðskrár Íslands
Sameining í ríkisrekstri – 1. Landið eitt skattumdæmi
Innkaupamál ríkisins
Innkaup á vörum og þjónustu eru um fjórðungur allra útgjalda ríkisins. Ríkisendurskoðun vill stuðla að því að dregið verði úr þessum kostnaði og að féð verði betur nýtt.
Í starfsáætlun Ríkisendurskoðunar um stjórnsýsluendurskoðun fyrir árin 2009–11 kemur fram að stofnunin muni á tímabilinu leita leiða til að auka sparnað í rekstri ríkisins og einstakra stofnana þess. Í þessu skyni verði sjónum m.a. beint að innkaupum ríkisins á vörum og þjónustu.
Úttekt Ríkisendurskoðunar á innkaupamálum ríkisins hófst haustið 2009 og skiptist í nokkra hluta. Gefin er út skýrsla eða sjálfstæð ábending um niðurstöður hvers hluta.
Gögn tengd verkefninu:
Ábending frá Ríkisendurskoðun. Framkvæmd og utanumhald rammasamninga
Ábending frá Ríkisendurskoðun. Innkaup löggæslustofnana
Ábending frá Ríkisendurskoðun. Viðskipti heilbrigðisyfirvalda við Heimilislæknastöðina ehf.
Ábending frá Ríkisendurskoðun. Kaup á tækniþjónustu vegna Norðurlandaráðsþings
Ábending frá Ríkisendurskoðun. Kaup Fasteigna ríkissjóðs á málningarþjónustu
Opinber innkaup. Áfangaskýrsla 4. Verktakagreiðslur hjá Fasteignaskrá
Opinber innkaup. Áfangaskýrsla 3. Viðskipti ríkisstofnana við 800 birgja
Opinber innkaup. Áfangaskýrsla 2. Verktakagreiðslur hjá Háskóla Íslands
Opinber innkaup. Áfangaskýrsla 1. Innkaupastefna ráðuneyta