22.03.2010
Ríkisendurskoðun ætlar að hafa eftirlit með því hvernig áform stjórnvalda um sameiningu stofnana munu ganga fram. Ríkisstjórnin hefur kynnt áform um að endurskipuleggja opinbera þjónustu og sameina stofnanir á næstu árum, sbr. fréttatilkynningu forsætisráðuneytisins frá 28. september sl. Í samræmi við lögbundið eftirlitshlutverk sitt mun Ríkisendurskoðun fylgjast með því hvernig þessi áform ganga fram og meta hvernig til tekst. Í þessu skyni hefur stofnunin útbúið lista með spurningum sem beint verður til ráðuneyta og stýrihópa. Þær lúta í senn að undirbúningi og framkvæmd fyrirhugaðra breytinga og fela í sér þau árangursviðmið sem stofnunin mun horfa til við matið.
Spurningalistinn verður sendur fyrrnefndum aðilum þegar formleg ákvörðun um sameiningu liggur fyrir eða þegar lög þar um hafa verið samþykkt á Alþingi. Ríkisendurskoðun mun vinna úr svörunum og öðrum upplýsingum og birta þau og niðurstöður sínar jafnóðum í opinberum skýrslum.
Á undanförnum árum hefur Ríkisendurskoðun unnið nokkrar úttektir á sameiningu ríkisstofnana. Í flestum þeirra var niðurstaðan sú að skipulagningu og undirbúningi sameiningar hafi verið ábótavant.
Þess má geta að umrætt eftirlitsverkefni er í samræmi við starfsáætlun Ríkisendurskoðunar fyrir stjórnsýsluendurskoðun á tímabilinu 2009–11 en þar kemur fram að stofnunin muni á tímabilinu leggja áherslu á svokallað samtímaeftirlit. Í því felst að fylgjast með stjórnun og rekstri ríkisins í samtíma í stað þess að gera úttekt eftir á, jafnvel að nokkrum árum liðnum, eins og hingað til hefur verið venjan í starfsemi stofnunarinnar.