Vakin er athygli á eftirfarandi athugasemdum og ábendingum:

1. Innra eftirlit
   Ríkisendurskoðun bendir á stofnunin hefur ekki lokið við gerð verkferla sem snúa að bókunum, samþykkt og greiðslu reikninga og einnig á eftir að ljúka verklagsreglum um stofnun, rekstur og lokun rannsóknarareikninga. Mikilvægt er að hraða vinnu, innleiðingu og skráningu verklagsreglna.
    
2. Viðskiptakröfur
   Ríkisendurskoðun gerir alvarlega athugasemd við fjölda óuppgerðra útistandandi krafna sem ná allt til ársins 2009. Fara þarf í að gera upp eldri kröfur með viðeigandi hætti í bókhaldi stofnunarinnar. Ítrekaðar eru fyrri athugasemdir um að eldri kröfur vegna ferðakostnaðar séu gerðar upp. Þá er nauðsynlegt að stemma stöðu í viðskiptamannabókhaldi (AR) við stöðu í fjárhagsbókhaldi (GL).
    
3. Viðskiptaskuldir
   Ríkisendurskoðun bendir á að töluvert er um óuppgerðar skuldir í fjárhagsbókhaldi stofnunarinnar og er óskað eftir að úr því verði bætt og þær gerðar upp. Stemma þarf stöðu í viðskiptamannabókhaldi (AP) við stöðu í fjárhagsbókhaldi og jafna út innbyrðisfærslur.
    
4. Handbært fé
   Gerð er athugasemd við að stofnunin skuli fara á svig við reglur sem gilda um sjóðsstýringu hjá ríkissjóði þar sem ekki er heimilt sbr. reglugerð nr. 822/2021 (áður reglur nr. 83/2000) að hafa meira en nemur 2% af upphæð fjárveitingar hverju sinni á bankareikningi. Raunvísindastofnun hefur því millifært fjármuni af bankareikningi á vörslureikninga yfir áramót. 
    
5. Vörslureikningar
   Gerð er athugasemd við meðferð vörslureikninga í bókhaldi Raunvísindastofnunar. Staða vörslureikninga var í tveimur tilvikum ekki í samræmi við stöðu í fjárhagsbókhaldi þar sem útreikningur og færsla gengismunar var ekki réttur. Fara þarf yfir hvort ekki sé hægt að loka bankareikningum þar sem verkefnum er lokið. Ekki er upplýst um stöðu vörslureikninga í skýringum með handbæru fé í reikningsskilum stofnunarinnar.