13.04.2016
Að mati Ríkisendurskoðunar er rekstraröryggi Keilis ehf. enn ótryggt. Stofnunin leggst gegn því að ríkissjóður gefi eftir 260 m.kr. skuld félagsins sem er tilkomin vegna húsnæðiskaupa þess.
Í eftirfylgniúttekt sinni á Keili ehf. frá árinu 2013 beindi Ríkisendurskoðun fimm ábendingum til Keilis ehf., mennta- og menningarmálaráðuneytis og Háskóla Íslands. Keilir ehf. var hvattur til að tryggja eigið rekstraröryggi, gæta að því að fjárveitingar ríkisins rynnu til umsaminna verkefna og efla faglegt gæðastarf sitt. Eins var Háskóli Íslands hvattur til að sjá til þess að frumgreinakennsla Keilis uppfyllti faglegar gæðakröfur. Loks var mennta- og menningarmálaráðuneyti hvatt til að efla eftirlit sitt og aðhald með einkareknum skólum sem það gerir þjónustusamninga við.
Í nýrri eftirfylgniúttekt sinni sér Ríkisendurskoðun ekki ástæðu til að ítreka þessar ábendingar sínar. Í meginatriðum hefur verið tekið á þeim þáttum sem athugasemdir voru gerðar við. Rekstraröryggi Keilis er þó enn ótryggt, m.a. vegna áframhaldandi tapreksturs félagsins og 260 m.kr. skuldar þess vegna fasteignakaupa af Þróunarfélagi Keflavíkurflugvallar ehf. (Kadeco). Ríkisendurskoðun leggst gegn því að Keili verði afhent umrædd eign án endurgjalds með eftirgjöf á skuld félagsins við ríkissjóð. Nái Keilir ekki að endurgreiða skuld sína er eðlilegra að ríkissjóður leysi eignina til sín og Ríkiseignum verði heimilað að gera leigusamning við Keili gegn sambærilegri greiðslu og aðrir skólar greiða sem ekki eru í beinni eigu ríkisins.