Skýrslan var unnin að beiðni fjárlaganefndar Alþings um úttekt á tilteknum fjárhagslegum þáttum í starfsemi Íslandspósts ohf. Óskaði nefndin sérstaklega eftir að kannað yrði hvort aðgreining samkeppnisrekstrar og einkaréttar hafi verið með fullnægjandi hætti; hver væri rót fjárhagsvanda félagsins og loks hver sé framtíðarsýn þess. Tilefni beiðninnar má rekja til þess að stjórn Íslandspósts ohf. leitaði um mitt ár 2018 til fjármála- og efnahagaráðuneytis um aðstoð til að mæta fyrirsjáanlegum greiðsluvanda.

Lagðar voru fram fjórar tillögur til úrbóta. Þær voru á ábyrgðarsviði Íslandspósts ohf., fjármála- og efnahagsráðuneytis og samgöngu- og sveitarstjórnarráðuneytis (nú innviðaráðuneyti). Þær sneru að því að tryggja þyrfti rekstrargrundvöll Íslandspósts ohf. til lengri tíma, móta sérstaka eigandastefnu fyrir félagið, efla eftirlit og að ráðast í frekari hagræðingaraðgerðir.

Brugðist hefur verið við flestum ábendingum Ríkisendurskoðunar frá árinu 2019, þó í mismiklum mæli. Íslandspóstur ohf. hefur, með stuðningi fjármála- og efnahagsráðuneytis, gripið til yfirgripsmikilla hagræðingaraðgerða sem hafa skilað mun betri rekstrarniðurstöðu en enn er talsverð óvissa og áhætta í rekstri félagsins, einkum vegna fækkunar bréfa. Í stað þjónustusamnings var Íslandpóstur ohf. útnefndur alþjónustuaðili póstþjónustu á Íslandi (2021–30) sem tryggir réttindi og skyldur félagsins. Fjármála- og efnahagsráðuneyti sér ekki ástæðu til þess að setja félaginu sérstaka eigandastefnu og vísar til almennrar eigandastefnu ríkisins fyrir félög í eigu ríkisins frá árinu 2021. Ekki er ástæða til þess að ítreka frekar ábendingar Ríkisendurskoðunar frá árinu 2019.